Mash
Anhörproben
Biografie
lies, wie's agfangä hed... 1986-1999 I 2000-01 I 2002 I 2003-04...
1986-1996
1986 hend dä stephan annen & dä peter müller mit ihrnä schuälfründä äm diego hediger & äm bruno schmidig d'rockbänd "the queers" gründäd. bereits zwei jahr schpötär hends denn ihrä bändnamä g'änderäd und "snap it" isch schnell zumänä begriff vo dä regionalä musigszenä wordä.
1990 hed "snap it" mit äm hansjörg römer jr. im schtudio „the place" in luzärn ihräs erschtä demoteip "...best wishes!" ufgnoh. ihrä ohräwurm-song "zrugg zu miär" hed denn äs jahr schpöter platz ufäm überregionalä sämplär "sz rock 1991" gfundä & "snap it" hed sich ändgültig i dä regionalä musigszenä etabliärt. mit em schtück "reklamä boogie" (schpöter i "schtimorol" umbenännt) sind sie 1991 sogar ufäm nazionalä sämplär "1. ch/szenen sampler" vertretä gsi.
1993 forderet dä erfolg en veränderig. so schtosst dä padi bernhard als nüä frontmaa & sänger zu dä band & us "snap it" wird ändlich "mash". zwei konzertriichi jahr schpöter waged sich „mash" wiedär is schtudio, um "hard to ignore" iizschpilä. über 1000 verchaufti schiibä bscheräd dä musikär zwar viil uftritt, setzäd sie gliichzytig aber au äs bitzli undär druck.
1996-1999
1996 bschlüssed denn dä diego & dä bruno us dä bänd uszschtiigä und wiedär drängt sich en veränderig uf. dä stephan, dä peter & dä patrik bschlüssed im früähjahr 1997 trotzdem wiitärzmachä & gfinded im markus bösch am schlagzüg & äm thomas tschan am keyboard diä richtig ergänzig. mä bschlüsst in dä zuäkunft nur no eignigs songmaterial z'produzierä & so entschtahd im mai 1998 im "jester record studio" in bärn dä "mash"-silberling "usschnitt". diä 4 eigäkompositionä gfalled allnä mash-fründä & bis ändi jahr sind alli 500 schiibä verchauft & d'nachfrag stiigt wiitär.
1999 fahd mit emenä paukäschlag a. "mash" wird zumnä uftritt i dä sändig "ventil" vom frank baumann iigladä. voller elan schtarted mash is jahr, doch äs folged nur äs paar wenigi summärkonzärt. nöch am ufgäh bschlüsst mä gägä ändi jahr s'nüä songmaterial ufenä zehdeh z'brännä. dä kusi gahd für 3 mönet nach auschtraliä & drum gits ä langi winterpausä. niemmer weiss, öb's nachhär no wird wiitergah & keinä ahnt zu dem zytpunkt, dass das di berühmti ruäh vorem schturm isch...
2000
im 2000 wird d'zehdeh mit em titäl „supermash" & em hit „nid vo bärn" a einigi radioschtationä verschickt & schlahd im januar i. drs3 schpiilt dä song ufä und abä & sogar dä polo national hofer findet dä song „...witzig!"
diversi plattenfirmenä wärdid uf „mash" ufmerksam & mä untärschriibt bim "zytglogge"-verlag in bärn dä erschti plattävertrag. ändi januar tritt „mash" i dä sändig „risiko" vo dä gabriela amgarten uf & gwünnt mit 61.7% dä begehrti goldhamschtär. vom 5.-12. märz 2000 nähmed diä 5 innerschwyzer im „backyard-studio" in bärn under dä leitig vom eric merz ihri erschti schiibä mit em titäl „nidvobärn" uf & am 12. mai 2000 wird sie im „quai 2" in brunnen tauft.
de erfolg lahd nid lang uf sich wartä. bis ändi jahr sind a di 3000 zehdehs verchauft & über 20 uftritt i dä ganzä schwiiz absolviärt, devo 3 mal sogar im fernsäh sfdrs! dä song „ewigi liäbi" lauft plötzlich uf fascht allnä privatradios i dä zentralschwiiz & isch uf „radio sunshine" sogar diä meischtgwähltischti balladä vom jahr 2000. mit dä 2 grossartigä konzert im usverchauftä „stadtkeller" in luzärn & als ufheizer vom polo hofer im „mythenforum" in schwyz beändet „mash" ihres bis dahin ihres erfolgrichschtä jahr...
2001
äs fallt uf, dass d'mash-konzärt vo immer meh lüüt bsucht wärdid. doch nid nur das, äs singed au immär meh lüüt mit & "ewigi liäbi" wird zur ultimativä live-hymnä! d'zehdeh "nidvobärn" stiigt im august in schwiizer hitparadä i, bliibt 20 wuchä i dä top 100 & erreicht mit em 18. platz im septembär d'top 20. i dä interne jahreshitparade vom "radio top" schlaad "ewigi liäbi" alles & wird zur beschtä single vom jahr gwählt. 19 wuchä lang hed sich dä song uf em erschtä platz feschtgnaglet. sogar dä blick hed platz für eiszwei chlini brichtli & d'nachfrag stiigt & stiigt. bis ändi jahr göhnd über 21'000 zehdehs über dä ladätisch, so dass scho bald vonerä goldigä schiibä gschprochä wird. doch no isch äs nid so wyt.
autogrammstundä oder promotion-uftritt werdid scho bald zum alltag & ändi summär wird vom innerschwyzer färnsehsänder "tele tell" sogar äs musigvideo zum mash-hit "ewigi liäbi" dreiht. am 11.11.01 erläbit über 500 personä im usverchauftä "alpärock-house" in chlotä d'videopräsentation zum mash-hit "ewigi liäbi". schtolz präsentiert d'band i dem jahr ihres allererschtä tishört, wo a jedem konzärt vomenä eigenä verchaufsteam under d'lüüt bracht wird. wiedär wird das jahr nach über 20 uftritt mit dä hammer-konzärt im "stadtkeller", in baar (mit sina, lovebugs & züriwest) & im "moonwalker" beänded. doch das isch erscht dä afang...
2002
dä knüller bereits am aafang vom jahr bietet mash grad sälber: vom berner zytglogge-verlag wächslet mä zum weltkonzärn bmg ariola schweiz. & so chunnts, dass mash scho am 27. april für 12 täg uf untersiggenthal im kt. aargau is schtudio gönd, um ihres zweitä album "erschti.hilf" ufznäh. mit em patrik schwitter & em ralph zünd isch s'richtigä tontechniker-team gfundä, wo dä unverkännbari mash-schtil vom debüt-album wiederholä & sogar no verbesserä söll.
wo s'album "erschti.hilf" am 12. auguscht i d'lädä chunnt, erreicht's uf aahiib platz 16 vo dä offiziellä schwiizer hitparadä & bliibt det für di kommendä 16 wuchä. dä blick schriibt: "...die innerschweizer schmusepopper mash sind seit ihrem hit "ewigi liäbi" total angesagt..." & dä mediärummel um dä padi zieht sini chreis. so gfind mä bis ändi jahr i allnä renomiertä illuschtriertä & zytschriftä bilder & text über dä padi & über mash.
am 20. september überreicht dä hanspeter müller am openair schupfart di erschti goldigi cd für über 25'000 verchaufti exemplar vo "nidvobärn" & ändi oktober erschiint dä videoclip zu "numä i dä schwiiz", wo wiederum im "alpärock-haus" in chlotä sini prömierä erläbt. dä rummel um mash & "ewigi liäbi" nimmt so grossi uusmass a, dass sogar s'album "nidvobärn" gliichzytig mit dä cd "erschti.hilf" i dä albumhitparadä platziert isch.
d'"miär.chönd.au.uf.di.ander.tour" dur di ganzi schwiiz findet ihrä abschluss mit dä x-mas soundnight (mit plüsch & polo) & em "heimschpiel"-konzärt im mythenforum in schwyz, wo näb dä barbara moser, dä caro chevin, dä sacha oberholzer & dä "blue horns" au no dä florian ast live sis gaschtschpiil gid & zämä mit em padi "ewigi liäbi" singt.
konzärttournee für 2003 schtahd bereits fescht, denn schliesslich isch nid eifach numä ä so i dä luzernär zytig gschtandä: "...und wenn der berner büetzer nicht mehr mag, mash kann immer!"
2003
bereits vo afang a wüssed d'jungs vo mash, dass sie ab auguscht en konzärtpause bruuchet, wenn's es nüüs dritts album sötti gäh. schliesslich isch mä sit fascht 3 jahr ununterbroche live unterwäx & findet chum me zyt zum probe oder komponiere. so erläbed die 5 eis highlight nach em andere. "ewigi liäbi" findet platz uf de beide schwiizer cd-sampler "just the best - swiss hits" & "s'bescht mundart album wo's git" & usserdem chame sit dem jahr de gröschti mash-hit au als handyton vom netz abelade.
mars macht mit em "ewigi liäbi" überall wärbig, genauso wie s'mythencenter in schwyz & d'band darf am "prix walo" als "special guest" ufträtte, während s'album "nidvobärn" zum 3. mal de schprung i d'albumhitparade schafft & det für 4 wuche bliibt! und sogar im eiwüchige wuko zum 20-jährige geburtstag vo drs3 isch "ewigi liäbi" dä meischtwünschti titel. d'konzärt-highlights vo dem jahr sind ganz klar: s'openair hochybrig, s'openair tufertschwil, s'openair gampel & s'seenachtsfest in küssnacht gsi. mash dankt allne fans, wo üs sit jahre begleitet & all dene, wos nümm chönnt abwarte, bis es wieder heisst: mash is back in town!
2004
s'jahr fahd trotz bühneabweseheit mit es paar knaller a. d'funpunk-version vo "ewigi liäbi" vo dä bieler punkband QL schiässt vo 0 uf platz 6 i dä schwiizer hitparade & inschpiriert d'finalischtin carmen fenk zu ihrem finale song vo dä erschtä "musicstar"-sändig im schwiizer färnseh. mit "ewigi liäbi" gwünnt sie denn sogar s'final & wird allererschtä musicstar vo dä schwiiz.
12 brandnüi mash-songs sind mitti mai fertig gschribä & zämä mit em ralph zünd schaffed d'band i unzähligä probe-stundä intensiv am letschtä schliff. s'einzigä konzärt i dem jahr findet am 12. juni am openair hochybrig statt & unzähligi mash-fäns lönd sich das nid entgah. es wird äs unvergässlichs konzärt & s'publikum - sowie d'mediä - sind total begeischteret!
mitti juli gahd's denn is zündstoffstudio uf goldau, wo alli 12 nüä mash-songs während über 2 1/2 mönat - während dä schönschtä & heissischtä tag - iigschpilt & ufgnoh wärded. äs isch diä längschti & interessantischti studioarbet i dä gschicht vo dä band & dä ralph zünd zeigt einisch meh, dass er d'band nid nur live immer perfekt abmischä cha! ändi novämber erschiint d'radiosingle "schlaflos" & und vill promotion-termin stönd ufem programm. d'vorbereitigä für die nüü live-tour laufed uf hochtourä & bereits im dezember chönd sich diä 5 jungs vo mash uf ene spannendi & interessanti konzärtsaison 2005 freue...
2005
am 10. januar 2005 erschiint s’dritte schtudioalbum „45minutä“ als allererschts mundartalbum vom jahr & platziert sich i dä schwiizer albumhitparade direkt ufem 13ni... - em beschte hitparadeplatz i dä bishärigä mashgschicht. bereiz am 21. januar schtartet d’band im schtadtchäller z’luzärn zu ihrer „45minutä-tour“ dur di ganz schwiiz. sie umfasst insgesamt 31 konzärt & total 6 färnsehuftritt.
im früehlig fusioniärt denn sony definitiv mit de bmg & ihri chefs wärded plötzlich i alli wind verschtreut. 5 mönet nach „schlaflos“ bringt d’sonybmg denn ändlich d’single „am arsch verbii“ uf dä markt, doch sie gfindet keis radio, wo sie schpillt. s’gliiche schicksal erliided denn au „märliland“ im herbscht & so konzertriärt sich d’band uf das, wo sie am beschte cha: uf ihri livekonzärt! sie schpiled zämä mit de carmen fenk in sevelen, mit „ql“ in thun, mit de sina (drs3.liveufdrgass) in herisau, mit de mia aegerter in bürglen oder mit em florian in brienz. & überall isch’s echo uf ihri uftritt riesig gross...
so chunnt’s, dass sie a dä openairs zofingen, scharans & wolfhalden s’publikum mit ihrerä livepresänz total überrasched, am openair hochybrig (zum 5. mal in folg uf dr hauptbühni) als letschi band am sunntig so richtig abruumt & am openair in tufertschwil vor dä „fanta 4“ über 12'000 zueschauer komplett begeischtered.
im summer überchunnt mash en platin-schiibä für über 40'000 verchaufti cd's vo "nidvobärn" & ihnä glingt ändlich de schprung us em schatte vo "ewigi liäbi"! sie sind nümme länger "die, wo 'ewigi liäbi' singed", sondern: mash, eini vo de beschte nationale liveacts.
am 17. dezämber 2005 beschlüsst mash im mythenforum z’schwyz, zämä mit dä caroline chevin, em schibä vo „aextra“, em marc a. trauffer vo „airbäg“ & em dani küffer am saxophon ihres vorläufig letschtä livekonzärt vor rund 800 fans & gladnä gäscht.
wie's wiitergahd, weiss band no nid, aber hiä wird's einisch schtah *grins*
2006
afangs 2006 gönnt sich band ä chlini "mash"-pause und probed heimlich als mundart-coverband "bölä & bänd" für's kommendi openair hochybrig. im februar macht dä padi mit em fäxe, em schibae vo "aextra", dä caro, em rickenbacher, em hansjörg und em ralph schpontan am nationale wettbewärb für de fuessball-nati-wm-song mit und landet als "delegation" mit em song "sieger" prompt uf dä nationale wm-sampler-cd. italiä schlad frankriich und wird fuessball- wältmeischter...
während jungs vo "mash" als "bölä & bänd" ihre 10. juni 2006 zum 6. mal uf de openair hochybrig-bühni stönd und det für diä grossi überraschig sorged, wird i de ganzä schwiiz scho fliisig de "gröschti hit vo allnä zytä" gsuecht. "ewigi liäbi" wird nominiert und landet i de gliichnamige sf-sändig vom 7. oktober 2006 uf em sensationelle 5. rang! dä polo national gwünnt verdient mit "alperose"...
während de stephan und dä thomi im summer en nüi band usem bodä schtampfed, schaffed de ralph mit em padi intensiv am endmix vom livealbum. churz vor wiehnachtä erschiint denn die 4. cd "mash & fründe (live)" und zytgliich au de letschti "mash"-song "wenn wiänacht isch" uf em schwiizer markt, wo de ralph zämä mit em padi und em hansi gschribä hed! am 16. dezembär 2006 schpiiled "mash" zum letschtä mal live vor rund 800 lüüt am "santa claus festival" in baar (zg)!
mit dem konzärt beschlüsst die erfolgriichschti schwyzer band nach 130 konzärt, gold- und platin-uszeichnigä und unzähligä färnsehuftritt ihri 7-jährigi bandkarriere bis uf wiiters a nagel z'hänke. die 5 bandmitglieder ahned zu dem zytpunkt no nid, dass äs ihres allerletschtä gemeinsame konzärt für vielleicht für immer gsi isch...
